RETIRED H.S PRINCIPAL NG AKLAN COLLEGE, NATAGPUANG PATAY SA KANYANG KUWARTO

Kalibo – Nagdadalamhati ngayon ang mga naging estudyante, co-teachers at mga kasamahan ni G.Rey Delos Reyes, retiradong high school principal ng Aklan Catholic College (ACC) matapos siyang matagpuan sa kanyang bahay sa Peraz Ville Subdivision sa Old Buswang, Kalibo na wala ng buhay.

Base sa imbestigasyon ng Kalibo PNP, ilan sa mga kapit-bahay nito doon ang nakalanghap ng masangsang na amoy galing sa loob ng bahay ni Delos Reyes, kung kaya’t nagsumbong ang mga ito sa kanilang barangay opisyal.

Puwersahan naman umanong pinasok ng mga nasabing opisyal ang bahay at inakyat ang ikalawang palapag kung saan naroon ang kuwarto ng biktima.

Wala na rin umano itong buhay nang makitang nakahiga doon.

Dumating naman kinalaunan ang mga taga Kalibo PNP, at SOCO para mag-imbestiga kung saan nalamang walang anumang foul play sa pagkamatay ni G.Delos Reyes.

Kaagad naman siyang dinala sa isang punerarya at inaasikaso narin ng kanyang pamilya.

Napag-alamang may sakit sa puso ang nasabing principal at posibleng inatake ito ng kanyang sakit tinatayang apat na araw na ang nakakalilipas hanggang sa matuklasan ang kanyang bangkay kanina.

Napag-alamang naglingkod din bilang Dean ng Educational Department ng ACC si Delos Reyes bago naging principal ng high school department.