Siklista sugatan matapos mabundol ng L300 van sa bayan ng Numancia

Sugatan at walang malay na isinugod sa ospital ng isang lalaking siklista matapos itong mabundol ng L300 van sa Brgy. Laguinbanwa East, Numancia nitong Linggo.

Napag-alaman na 51-anyos ang biktima at residente ng Linabuan sa Bayan ng Kalibo ngunit kasalukuyang naninirahan sa Brgy. Camanci sa naturang bayan.

Batay sa imbestigasyon ng Numancia PNP, mula sa Kalibo ang L300 van na minamaneho ng 45-anyos na lalaki.

Sinasabing, dahil sa madulas na daan ay umikot umano ang van pagdating sa lugar hanggang sa tumungo ito sa kabilang linya dahilan ng pagkabundol nito sa kasalubong na siklista.

Sugat sa ulo at iba’t-ibang bahagi ng katawan ang tinamo ng biktima na agad ding dinala sa Aklan Provincial Hospital.

Samantala, pansamantala namang ikinustodiya ng mga otoridad ang driver ng van para sa karampatang disposisyon.