Aklan News
Tiyuhin, nabaril ng pamangkin sa Libacao; kasong frustrated homicide, isinampa laban sa suspek
Sinampahan na ng kasong Frustrated Homicide ang 21-anyos na suspek matapos umano’y nabaril ang sarili nitong tiyuhin sa Barangay Rosal, Libacao.
Ang suspek na hindi na pinangalanan ng pulisya ay kinilalang alyas “Louie,” 21-anyos habang ang biktima ay si alyas “Remy”, 44-anyos, parehong residente ng naturang barangay.
Sa imbestigasyon ng Libacao MPS, bandang alas-4 ng hapon ng Biyernes, Abril 11, nang pumunta ang biktima sa bahay ng suspek para kumprontahin tungkol sa nawawala nitong alagang “native” na manok.
Sa paglabas umano ni alyas “Louie”, walang anu-ano’y bigla itong binaril sa kanang braso na dumiresto sa kanang ibabang bahagi ng tiyan.
Pagkatapos ng insidente, umano’y biglang tumakas si alyas “Louie” sa lugar.
Samantala, agad namang sinugod ang biktima sa Libacao Infirmary at ini-refer sa isang hospital sa bayan ng Kalibo.
Sa ngayon, kasalukuyang nasa kustodiya ng Libacao Municipal Police Station ang suspek para sa karampatang disposisyon. | Ulat ni Arvin Rompe
