TRAK NA INIWAN NG DRAYBER,  BUMANGGA SA PADER

Nagulat ang ilang residenteng malapit sa highway ng Cabangila, Altavas matapos bumangga sa pader ang isang trak na iniwan umano ng driver nito.

Bagama’t hindi na pinangalanan ng Altavas PNP ang driver maging ang may-ari ng bahay, nabatid na galing Iloilo papuntang Kalibo ang trak na may kargang construction supplies.

Ayon sa Altavas PNP, inihinto ng driver ang trak sa layong 20 metro sa check point, bumaba at naglakad pabalik sa check point upang ipakita ang kanyang bar code sa contact tracing.

Subali’t unti-unti palang tumakbo ng kusa ang trak, lumiko pakaliwa at bumangga sa pader na naroon.

Ayon pa sa Altavas PNP, aminado umano ang driver na nagmalfunction na ang hand brake ng trak sa Iloilo palang, kung kaya’t niremedyuhan na lamang niya ng screw driver bilang lock sa foot brake.

Subali’t posible umanong natanggal ito, rason ng kusang pagtakbo ng trak.

Mapalad namang walang nasaktan sa insidente, habang nagkasundo naman umano ang magkabilang panig na ipaayos ang nasirang bahagi ng pader.