Traysikel nasagi ng van, 2 sugatan

Numancia – Dalawa ang sugatan matapos aksidenteng masagi ng van ang isang traysikel bandang alas 9:00 kagabi sa Bulwang, Numancia.

Nakilala ang magkapatid na biktima na sina Vincent Gonzales, 32 anyos na drayber ng tragsikel, at sakay nitong kapatid na si Sharmaine Gonzales, 25 anyos, kapwa residente ng Laguinbanwa East, Numancia, habang nakilala naman ang drayber ng van na si Nonito Andrade, 60 anyos ng Purok 4, C. Laserna St., Poblacion, Kalibo.

Base sa imbestigasyon ng Numancia PNP, pauwi na noon ang magkapatid nang aksidenteng masagi ng van, nang mag-overtake umano ito sa isang Roro Bus.

Resulta, nagtamo ng sugat sa kaliwang kamay ang biktimang si Vincent, habang sugat sa kaliwang paa naman ang kanyang kapatid.

Minarapat silang iconfine sa ospital, habang nasa kustodiya ngayon ng Numancia PNP ang driver na si Andrade habang inihahanda ang kasong Reckless Imprudence resulting in Physical Injury and Damage to property na isasampa laban sa kanya ngayong araw.