TRAYSIKEL, NINAKAWAN NG GASOLINA NG 4 NA MINOR DE EDAD

Banga – Apat na minor de edad ang naaktuhang nagnanakaw ng gasolina sa nakaparadang traysikel alas 2:30 kaninang madaling araw sa Daguitan, Banga.

Ayon sa Banga PNP, minarapat umano ng may-ari ng traysikel na si Ryan Rusgal na bantayan kung sino ang nagnakaw ng gasolina sa kanyang traysikel nitong nakaraang araw.

Hindi naman ito nabigo sa pagbabantay dahil naaktuhan umano nito kanina ang mga nasabing minor de edad habang sinasahod ng dala nilang bote ang gasolina mula sa traysikel.

Kaagad namang tumawag ng pulis si Rusgal kung kaya’t kaagad dinala sa presento ng Banga PNP ang 4 kasama ang narekober na boteng naglalaman ng ninakaw umanong gasolina.

Samantala, ayon pa sa Banga PNP, posibleng ikakarga din ng mga binatilyo ang ninakaw na gasolina sa ipinang si-service nilang motorsiklo sa kanilang pagliliwaliw.

Nabatid na edad 15 hanggang 17 anyos ang mga binatilyo.