TRIGGER WARNING: Alagang baboy sa Numancia, natagpuang patay at putol ang katawan

Nagulantang ang isang residente ng Brgy. Navitas, Numancia nang matagpuan ang kanyang alagang baboy na wala ng buhay at putol ang katawan.

Sa panayam ng Radyo Todo sa may-ari ng baboy na si Delbert Agravio, dalawang araw palang umano na nasa kanya ng biik na binili nito sa halagang P5,000.

Aniya, umaga umano nang huli nitong pakainin ang alaga tsaka binalikan pa nito dakong alas-3:00 ng hapon.

Ngunit nang papakainin na sana nitong muli ang baboy kagabi ay wala na ito sa kulungan.

Nilibot nila ang lugar at natagpuan nalang ang kalahating katawan nito na wala ng lamang-loob.

Wala rin umanong bakas ng dugo sa lugar kaya palaisipan sa ilang residente kung ano ang may kagagawan nito.

Samantala, naniniwala naman si Agravio na aso ang nasa likod ng nangyari sa kaniyang alagang baboy.

Napag-alaman na dati nang nag-aalaga ng baboy si Agravio ngunit dahil sa ASF ay ngayon lang ito muling sumubok na mag-alaga.