TRIGGER WARNING: Babaeng senior citizen, pinakitaan ng ari ng isang lalaking nakamotor sa Numancia

NAGULAT AT NATAKOT ang isang babaeng senior citizen matapos itong pakitaan ng ari ng isang lalaking sakay ng motor sa Brgy. Tabangka, Numancia nitong Martes.

Batay sa report, nakatambay umano ang senior citizen sa labas ng kaniyang bahay nang may napadaang motorsiklo.

Tinanong niya pa ang motorista kung anong pakay at sumagot naman ito.

Ngunit sa hindi inaasahan ay napansin nalang ng senior citizen na bukas na ang zipper ng naturang motorista at nakalabas na ang kaniyang ari.

Pagkatapos umano ay humarurot naman palayo ang lalaki sakay ng kaniyang motor.

Kaagad naman itong inireport ng babae sa kanilang barangay at ipina-record sa Numancia PNP.

Matatandaang, isang single mom rin sa Makato ang pinakitaan ng ari at nilaro pa sa kaniyang harapan.

Sa ngayon ay nagpapatuloy pa ang imbestigasyon ng mga otoridad para matukoy ang lalaki at malaman kung iisa lang ba ang may kagagawan ng insidente sa bayan ng Makato at Numancia.