UPDATE| DAYWA SA AP-AT NGA SUSPEK SA PAGPANGHOLDAP-PATAY SA LIBACAO, NAKILAEA EON

50 mil pesos nga reward, igatao ni Mayor Navarosa.

Libacao, Aklan – Nakilaea eon it mga otoridad ro daywa sa ap-at ka mga suspek sa pagpangholdap ag pagpatay sa sangka lending collector sa Pampango, Libacao ko Biyernes.

Sa pagpakig-angot kay PCapt. Willian Aguirre it Libacao PNP, nasayuran nga may saksi nga nakakita sa paghukas it mga suspek sa t-shirt nga tabon sa andang itsura samtang nagpaeagyo.

Positibo ra sanda nga ginkilaea it saksi apang sa makaron hay nagpamalibad pa si Aguirre nga ipaguwa ro pangaean it mga suspek nga padayon pa nga gina manhunt it mga kapulisan.

Angot kara, ginpasiguro man ni Aguirre nga pagapasakaan nanda it kaso ro nasambit nga mga suspek kun indi nanda maaresto.

Panawagan lang ni Aguirre, sa mga pumueoyo sa banwa it Libacao nga magbulig sa pagsolbar it kaso paagi sa pagtao it impormasyon angot sa posibleng ginapanaguan it mga suspetsado.

Suno kana, nagtao eon it 50 mil pesoa nga reward si Libacao Mayor Charito Navarosa para sa makaturo ag magaresulta sa pagkadakop it mga suspek.

P50-K NGA REWARD IGATAO NI MAYOR NAVAROSA SA MAKATURO SA LOKASYON IT MGA SUSPEK SA PAGPATAY SA LIBACAO

Libacao, Aklan – Magatao it 50 mil pesos nga reward si Mayor Charito Navarosa sa kung sin-o man ro makaturo sa lokasyon it mga suspek sa pagpatay sa sangka lending collector sa banwa it Libacao.

Raya ro ginkumpirma sa Radyo Todo ni Libacao Chief of Police PCapt William Aguirre. 

Sa pakig-angot it Radyo Todo sa alkalde, ginkumbinyo na rong mga pumueoyo nga magbulig sa madasig nga pagsolbar it krimen.

Madumduman nga gintambangan it ap-at ka eaeaki nga may tabon sa itsura si John Rey Modero, sangka lending collector it ASA Phils. nga ginholdap ag ginpatay ko biyernes sa Brgy. Pampango sa nasambitan nga banwa.

Sa makaron hay padayon pa nga gina man hunt it mga kapulisan ro ap-at ka mga suspetsado.