WANTED, INARESTO HABANG UMA-ATTEND NG HEARING

Kalibo – Arestado habang nasa court hearing ng sariling kaso ang isang lalaking wanted din pala sa kasong Attempted Theft o pagnanakaw.

Sa joint operaration ng Aklan PNP Trackers team at Balete PNP, naaresto ang akusadong si Jemar Magbanua Elera, 33 anyos na tubong Bacolod City, Negros Occidental at kasalukuyang residente ng Oyotorong St., Riverside, Kalibo.

Sa bisa ito ng Warrant of Arrest na nilagdaan at ibinaba ni Hon.Bienvenido P.Barrios, Presiding Judge RTC 6, Branch 3, Kalibo na may petsang April 11, 2017.

Kaugnay nito pansamantala siyang ikinustodiya ng Balete PNP para sa karampatang disposisyon.

Samantala bagama’t tumanggi nang idetalye pa ni Elera ang tungkol sa kanyang kasong dinidinig, sinabi nitong pinagbintangan lamang siya noong 2015 sa kasong pagnanakaw sa Balete.

Inirekomenda ng korte ang P4,000.00 na piyansa para sa kanyang pansamantalang kalayaan.