Welder, huli sa buy bust operation sa isla ng Boracay

Timbog sa kinasang buy bust operation ng mga kapulisan ang isang welder ngayong madaling araw sa Balabag, Boracay Island, Malay, Aklan.

Nakuha sa suspek na si Sonny Dumahod ang isang sachet ng shabu kapalit ng P5000 na buy bust money at dagdag na dalawa pang sachet ng shabu sa body search.

Nasa 4.5 grams ang kabuuang timbang ng droga na may dangerous drugs board value na P30,600.

Inamin naman niya na ilang buwan na siyang nagbebenta ng droga na kinukuha niya pa sa Roxas City para dalhin sa isla ng Boracay.

Sa bawat deliver ay libre umano siyang nakakagamit ng droga at kumikita siya ng P2000.

Pahayag pa nito, nagawa niya lamang ito dahil sa hirap ng buhay at dahil sa kawalan ng permanenteng trabaho.

Mahaharap si Dumahod sa kasong paglabag sa RA 9165 o Comprehensive Dangerous Drugs Act of 2002.