21-anyos na lalaki tinaga ng kainuman sa Dumarao, Capiz

Sugatan ang isang 21-anyos na lalaki matapos siyang tagain ng kainuman sa Brgy. Ongol Ilawod, Dumarao sa probinsyang ito gabi ng Miyerkules.

Kinilala ang biktima na si Tayson Miranda habang ang suspek naman ay si Wilfredo Cordero, 40, pawang mga residente ng nasabing lugar.

Batay sa paunang imbestigasyon ng Dumarao PNP, nag-inuman ang dalawa nang umuwi saglit ang suspek at bumalik sa lugar bitbit ang isang itak.

Kinompronta ng suspek ang biktima kumbakit hindi pa ito umuwi bagay na kinairita ng huli at kumuha ng pinutol na kawayan na kaniyang ipinanghambalos sa suspek.

Sinubukan pang awatin ng ina ng biktima ang dalawa subalit nakapaghiganti ang suspek at tinaga ang biktima.

Isinugod agad sa ospital ang biktima para magamot habang inaresto naman at ikinulong sa lock-up cell ng Dumarao PNP Station ang suspek.