3 LALAKI SUGATAN SA PANANAGA SA DUMARAO, CAPIZ

Sugatan ang tatlong lalaki matapos magtagaan sa Sitio Terum, Brgy. Codingle, Dumarao, Capiz nitong Linggo ng gabi.

Kinilala ang mga biktima na sina Andy Bajon, 33-anyos, Jomar Ladate, 34, mga residente ng nasabing lugar.

Sugatan din ang suspek na kinilalang si Jason Ladate, 27, ng parehong lugar.

Ayon sa imbestigasyon ng Dumarao PNP, nag-inuman umano ang suspek at ang biktima na si Andy Bajon nang magkaroon sila ng pagtatalo. Umuwi umano ng bahay ang biktima pero sinundan ito ng suspek at kumuha ng bolo saka pinagtataga ang nasabing biktima.

Nagtamo si Andy ng sugat ng pananaga sa kaniyang leeg, tenga, at kamay.

Naawat ang suspek ng kaniyang kuya na si Jomar Ladate pero sinundan rin siya ng suspek sa kaniyang bahay at pinagtataga.

Nakadepensa si Jomar Ladate at pinagtataga rin nito ang suspek na tumama sa kaniyang balikat at mga kamay.

Isinugod ang tatlo sa ospital para gamotin habang iniimbestigahan pa ng kapulisan ang insidente.