55-ANYOS NA LALAKI NATAGPUANG PATAY SA DAMUHAN SA PILAR, CAPIZ

Isang patay na lalaki ang natagpuan sa isang damuhan sa Sitio Libas, Brgy. Esteban, Pilar, Capiz dakong alas-6:30 ng gabi nitong Lunes.

Kinilala ang biktima na si Julius Barce, 55-anyos, isang driver, residente ng Brgy. San Ramon sa nasabing bayan.

Ayon sa inisyal na imbestigasyon ng Pilar PNP, nagpapastol ng kaniyang baka si Victor Barce, 59, residente ng Brgy. Esteban, nang kaniyang matagpuan ang biktima sa damuhan. Agad itong humingi ng tulong sa mga opisyal ng barangay.

Nabatid na nakita pa ni Victor ang biktima umaga ng Lunes sa nasabing sakahan kung saan natagpuan ang kaniyang patay na katawan.

Ayon sa asawa ng biktima na si Vergie, 59, nakakaranas ng hypertension ang kaniyang mister. Naniniwala ito na namatay ang biktima sa naturang sakit.

Isasailalim sa post mortem examination ang bangkay ng biktima.