Alkalde ng Dumarao, Capiz nagpositibo sa COVID-19

Kinompirma ni Mayor Edgardo Arancillo ng Dumarao, Capiz na nagpositibo ito sa COVID-19 batay sa advisory na kaniyang inilabas nitong hapon.

Sinabi ng alkalde na wala munang transaksiyon sa kaniyang opisina simula ngayong araw pati na ang Vice Mayor’s Office at SB Session Hall kung saan naging venue ng ilan niyang mga meeting.

Ang pansamantalang pagsasara ng mga nasabing tanggapan ay para bigyang-daan ang disinfection ng mga ito para sa kaligtasan ng lahat.

Ang mga empleyado sa Mayor’s Office ay isinailalim sa quarantine. Ang mga transaksiyon ay tatanggapin ng Administrative Office.

Magbubukas naman ang Vice Mayor’s Office bukas matapos ang disinfection. Nilinaw ng alkalde na wala naman itong direct contact sa mga empleyado ng nasabing tanggapan.

Pinasiguro ni Arancillo na patuloy na kumikilos ang pamahalaaang lokal ng Dumarao para masugpo ang pagkalat ng COVID-19 sa kanilang bayan.