BABAE PATAY MATAPOS TAGAIN AT BARILIN NG KANIYANG LIVE-IN PARTNER SA DUMARAO, CAPIZ

Patay ang isang babae matapos siyang tagain at barilin ng kaniyang live-in partner sa Sitio Agmanakit, Brgy. Dacuton, Dumarao, Capiz.

Kinilala ang biktima na si Ana Mae Lozada Castor, 28-anyos, habang ang suspek ay si Argie Celiz Mondia, 35, laborer, parehong mga residente ng nasabing lugar.

Batay sa report ng Dumarao PNP, umuwi umano ang suspek sa kanilang bahay na nakainom madaling araw nitong Huwebes at pinaghahanap ang live-in partner.

Nang matagpuan ng suspek ang live-in partner nito sa kubo sa labas ng bahay at nakahiga sa duyan, tinanong nito kung saan ito galing. Sagot ng babae, “Halin sa migo ko eh!”

Dito tinaga ng suspek ang live-in partner at tinamaan sa kaniyang kanang kamay. Nagawa ng babae na makatakas at nagtungo sa palayan pero hinabol ito ng suspek at binaril. Tinamaan ng di pa malamang kalibre ng baril ang biktima sa kaniyang puwit.

Agad na isinugod sa Senator Gerardo M. Roxas Memorial Hospital sa Dao, Capiz ang biktima pero dineklara itong dead on arrival. Sumuko naman sa mga opisyal ng barangay ang suspek.

Nasa kostudiya ngayon ng Dao PNP Station ang suspek para sa kaukulang disposisyon.