Guro naaksidente sa motorsiklo dahil sa tumawid na aso, sugatan

Sugatan ang isang guro matapos maaksidente sa kaniyang menamanehong motorsiklo sa Brgy. Salocon, Panitan, Capiz dahil sa tumawid na aso.

Kinilala ang biktima na si Aljun Bade, 27-anyos, residente ng Brgy. Marita, President Roxas, Capiz.

Ayon sa report ng Panitan PNP, binabaybay ng biktima ang kahabaan ng national highway nitong Sabado mula sa Roxas City papauwi sa kanila nang siya ay maaksidente dakong 11:25 ng umaga.

Nabatid na nawalan ito ng kontrol sa kaniyang menamanehong motorsiklo nang may bigla nalang na tumawid na aso sa kalsada.

Nagtamo ng sugat sa iba-ibang bahagi ng katawan ang biktima at agad na isinugod sa Bailan District Hospital ng mga rumespondeng tauhan ng Panitan MDRRMO.