LALAKI NA NAIREPORT NA MISSING SA ROXAS CITY, NAHULIHAN NG SHABU SA BATANGAS PORT

Isang lalaki na naireport na missing dito sa Roxas City ang inaresto ng mga otoridad sa Batangas Port matapos itong mahulihan ng pinaghihinalaang shabu.

Kinilala ang lalaki na si Erick John Neñeria, residente ng Brgy. Cagay, Roxas City.

Ayon sa report ng Philippine Coast Guard District Souther Tagalog, nagsasagawa ng operasyon ang mga tauhan ng Philippine Port Authority Batangas, Coast Guard Station Batangas, CGK9 at Philippine Drug Enforcement Agency sa nasabing port nang may naamoy ang K9 dog sa bagahe ni Neñeria.

Nasabat ng mga otoridad ang nasa 50 gramo na pinaghihinalaang shabu.

Matatandaan na una nang ipinanawagan ng ina ng suspek na si Editha Neñeria na nawawala ang kaniyang anak matapos magpaalam lamang umano na pupunta sa kaniyang kakilala.

Nasa kostudiya ngayon ng PDEA Calabarzon ang nasabing suspek. Mahaharap ito sa kasong paglabag sa Republic Act 9165 o Comprehensive Dangerous Drugs Act of 2002.