LALAKI TINAGA NG KAINUMAN SA IVISAN, CAPIZ

Sugatan ang isang lalaki matapos siyang tinaga ng kaniyang kainuman sa Sitio Baybay, Brgy. Basiao, Ivisan, Capiz.

Kinilala ang biktima na si Romel Casino, 27-anyos, isang lifeguard, habang ang suspek ay kinilala namang si Anthony Erederos, 44, parehong mga residente ng nasabing barangay.

Ayon sa report ng Ivisan PNP, nag-inuman umano ang suspek at ang biktima kasama ang girlfriend ng huli at ilang iba pa sa tindahan ng suspek nang maganap ang insidente.

Nabatid na umuwi pa ang biktima at ang girlfriend nito pero ilang sandali lang ay binalikan niya ang suspek at pinagsusuntok at pinagsisipa ito hanggang sa matumba.

Gumanti ang suspek matapos kumuha ng itak sa kaniyang sasakyan at tinaga ang biktima na tumama sa kaniyang ilong.

Isinugod sa Roxas Memorial Hospital ang biktima para gamutin habang naaresto naman ang suspek sa hot pursuit operation ng kapulisan.