LOLA HINAMPAS NI LOLO NG KAWALI DAHIL UMANO SA SELOS

Nagtamo ng sugat sa ulo ang isang 72 anyos na lola matapos umanong hampasin ng kawali ng kaniyang 74-anyos na mister dahil sa selos.

Naganap ang insidente sa kanilang bahay sa Brgy. Dumolog, Roxas City umaga nito Martes.

Nabatid na naghuhugas ng kawali ang matandang babae matapos paglutuan ng sinangag nang manghingi umano ng sandok si lolo para isandok sa sinangag.

Hinuhugasan pa umano ng lola ang nasabing sandok pero bigla nalang siyang hinampas ni lolo ng kawali sa kaniyang ulo.

Sinasabing nagseselos si mister dahil palagi umanong umaalis ang asawang babae para magbilad ng isda at maghanap ng pera para sa kanilang mga gastusin sa bahay.

Isinugod sa Roxas Memorial Provincial Hospital ang senior citizen matapos magtamo ng sugat sa ulo habang ang insidente ay nakarekord na sa barangay.