Lolo patay matapos pagbabarilin ng isang dating guro sa Maayon, Capiz

Patay ang isang lolo matapos pagbabarilin ng isang dating guro sa Sitio Alawihaw, Brgy. Balighot, Maayon, Capiz umaga nitong Biyernes.

Kinilala ang biktima na si Percito Tolentino, 76-anyos, isang magsasaka at residente ng nasabing lugar. Kinilala naman ang suspek na si Pascual Dumagpi, 66, retired public school teacher at residente sang Poblacion Tabuc, sa parehong bayan.

Ayon sa imbestigasyon ng Maayon PNP, papauwi ang biktima sakay ng kaniyang kalabaw nang harangin siya ng suspek at pinagbabaril ito ng makaapat na beses gamit ang .45 caliber.

Mabilis na tumakas ang suspek kasunod ng insidente.

Nagtamo ng ilang sugat ng pamamaril sa tiyan ang biktima. Mabilis itong dinala ng pamilya sa Bailan District Hospital para gamotin. Kalaunan ay nilipat siya sa Roxas Memorial Provincial Hospital pero binawian ito nang buhay habang ginagamot rito.

Pinaniniwalaan na away sa lupa ang sanhi ng krimen.

Patuloy na tinutugis ng kapulisan ang suspek.