Magsasaka patay matapos pagbabarilin ng tanod sa Dumarao, Capiz

Patay ang isang magsasaka matapos binaril ng isang tanod sa bayan ng Dumarao, Capiz kahapon.

Kinilala ang biktima na si Buenvenido Hinguillo Alinain alyas Bening, 62-anyos, habang ang suspek ay si Ranjie Gallego Halamane alyas Bong-Bong, 46, parehong mga residente ng Brgy. Bungsuan sa nasabing bayan.

Batay sa paunang imbestigasyon ng Dumarao PNP, nagpapagasolina ang suspek sa isang tindahan nang sumugod ang biktima at nagkaroon sila ng pagtatalo.

Sinampal umano ng biktima ang suspek dahilan para bumunot ang huli ng umanoy .45 caliber na baril at nagbaril sa lupa bago pinagbabaril ang biktima.

Agad na isinugod sa Sen. Gerardo M. Roxas Memorial District Hospital sa bayan ng Dao ang biktima pero hindi na umano ito umabot pa ng buhay ayon sa doktor.

Mabilis namang nakatakas ang suspek matapos ang insidente kasama ang pamilya nito.

Nabatid na parehong nakainom ang dalawa nang manyari ang insidente.

Patuloy ang imbestigasyon ng kapulisan sa kaso.