OFFICER NG MICROFINANCE HINOLD-UP SA DUMARAO, CAPIZ; MAHIGIT PHP27K NATANGAY

Hinold-up ang isang officer ng isang microfinance sa Sitio Nagdong, Brgy. Bugsuan, Dumarao, Capiz hapon ng Lunes. Natangay ng suspek ang mahigit Php27,000 na koleksiyon ng biktima.

Kinilala ang biktima na si Alvin De Jose, 24, development officer ng Ahon sa Hirap Inc. (ASHI) at residente ng Brgy. Burias, Mambusao, Capiz.

Ayon sa inisyal na report ng Dumarao PNP, pabalik ng kanilang opisina sa Brgy. Poblacion, Ilya ang biktima sakay ng kaniyang motorsiklo mula sa Brgy. Gibato nang maganap ang insidente.

Pinara umano ng suspek ang motorsiklo ng biktima at tinutukan ng isang short caliber na baril ang biktima mula sa kaniyang baywang at nagdeklara ng hold-up.

Natangay ng di pa nakikilalang suspek ang nasa Php27,685 na koleksiyon na nakalagay sa kaniyang bag. Mabilis na tumakas ang suspek matapos ang insidente.

Patuloy ang imbestigasyon ng kapulisan sa insidente.