Tricycle driver arestado sa buybust operation sa Pontevedra, Capiz

Arestado sa buy bust operation ang isang tricycle driver sa Brgy. Bailan, Pontevedra Capiz hapon ngayong Huwebes.

Kinilala sa report ng Pontevedra PNP ang suspek na si Joemar Delfin, 34-anyos, residente ng Brgy. Cogon, Panitan.

Batay sa report ni KaTodong Butchoy Gardose sa lugar, nabilhan ng isang sachet ng pinaghihinalaang shabu ang suspek kapalit ng Php500.00.

Sa pagrikisa sa kaniyang katawan, narekober din ang apat pa na sachet ng pinaniniwalaang shabu at isang yunit ng cellphone.

Ayon kay PMaj. Christopher Candelario,  hepe ng Pontevedra PNP,  ilang linggo naring minamanmanan nila ang suspek. Ang operasyon umano niya ay sa Brgy. Bailan at sa bahagi ng bayan ng Panay.

Kumukuha umano ito ng suplay sa Roxas City. Sasailalim pa ayon sa hepe sa karagdagang imbestigasyon ang suspek.

Ayon kay KaTodong Butchoy, sa umpisa ay todo tanggi ang suspek sa kaniyang pagkakasangkot sa iligal na droga pero kalaunan ay nakapagsabi itong kaya siya napunta sa Brgy. Bailan ay dahil sa kaniyang transaksiyon.

Nakakulong na ngayon ang suspek sa Pontevedra PNP Station at nakatakdang sampahan ng kasong paglabag sa Republic Act 9165 o Comprehensive  Dangerous  Drugs Act of 2002.