BANGKAY NG BABAE, NATAGPUAN SA LOOB NG NAKAPARADANG SASAKYAN

Natagpuan ang bangkay ng isang babae sa loob ng nakaparadang sasakyan sa Barangay Inangayan, Sta. Barbara Martes, Oktubre 26.

Batay sa imbestigasyon ng pulis, nasa advance stage of decomposition na ang natagpuang bangkay.

Kinilala ang bangkay na si Claire Diergos, 36 anyos ng Deca Homes, Pavia na mula sa Dagsaan, Buenavista, Guimaras.

Batay sa ulat, nang buksan ang Montero Sports, nakabalot ang biktima sa isang comforter at nakalagay sa passenger seat sa likod ng sasakyan.

Ayon kay Inangayan, Sta. Barbara Punong Barangay Ricardo Bayog, nakatanggap siya ng impormasyon na nitong Oktubre 23 ng umaga, napansin na ilang residente na may nakaparadang sasakyan sa kanilang barangay.

Aniya pa, pagkagabi umano ay may namataang babae at lalaki na bumaba mula sa sasakyan.

Batay naman kay Police Major Reymond Celoso, hepe ng Sta. Barbara Police Station, may tatlong sugat sa leeg si Diergos at may sugat sa kamay na pinaniniwalaang defense wound niya.

Dagdag pa ni Celoso maaaring sa ibang lugar pinatay ang biktima at iniwan lang sa naturang barangay.

Patuloy namang inaalam ng mga awtoridad ang motibo sa insidente.