‘SHURI CASTLE’ SA JAPAN NA WORLD HERITAGE SITE, NASUNOG

Nilamon ng apoy ang Shuri Castle na isang World Heritage site sa Okinawa, Japan, madaling araw nitong Huwebes.

Ayon sa ulat, nakatanggap umano ng tawag ang mga emergency responders na may sumiklab na sunog sa Naha, Okinawa bandang 2:40 ng madaling araw.

Agad namang rumesponde ang mahigit 10 fire engines para apulahin ang sunog.

Wala namang napaulat na nasaktan sa sunog at inaalam pa kung ano ang pinagmulan ng apoy.

Itinayo ang Shuri Castle 500 taon na ang nakalipas sa Ryukyu Dynasty, at itinalaga itong national treasure noong 1933.

Magugunitang nauna itong naabo matapos kainin ng apoy sa panahon ng World War Two at muling itinayo taong 1990.