Tsina, nanawagan sa Pilipinas na isaalang-alang ang kanilang Ugnayan para sa kinabukasan

BEIJING — Nanawagan ang Tsina sa Pilipinas na ‘seryosong isaalang-alang ang kinabukasan’ ng kanilang relasyon na ayon sa People’s Daily, pahayagan ng Communist Party, ay ngayon ay ‘nasa isang crossroads.’ Ito ay kasabay ng lumalalang tensyon sa West Philippine Sea.

Sa mga nakaraang buwan, nagpalitan ng bintang ang Pilipinas at Tsina hinggil sa sinadyang pagbangga ng mga coast guard vessels sa pinag-aagawang katubigan. Isang insidente noong Hunyo ang nagresulta sa pagkasugat ng isang daliri ng isang Pilipinong marino.

Sinabi sa komentaryo ng Tsina, ‘Ang relasyon ng Tsina at Pilipinas ay nasa isang sangandaan, at kailangang mamili ng tamang landas.’ Ayon pa rito, ‘Ang dayalogo at konsultasyon ang tamang landas dahil walang resolusyon sa sigalot sa pamamagitan ng konprontasyon.’

Hinikayat din ang Maynila na ‘seryosong isaalang-alang ang hinaharap ng ugnayan ng Tsina at Pilipinas at makipagtulungan sa Tsina upang maibalik sa tamang landas ang bilateral na relasyon.’

Ito ay pinahayag sa ilalim ng pen name na “Zhong Sheng” o “Voice of China”, karaniwang ginagamit upang ilahad ang pananaw ng Tsina sa mga isyung pang-foreign policy.

Ipinaglalaban ng Beijing ang halos buong South China Sea, bahagi nito ay inaangkin din ng Pilipinas, Brunei, Malaysia, Taiwan, at Vietnam. Ang bahagi ng katubigan kung saan dumadaan ang $3 trilyon halaga ng kalakal taun-taon ay sinasabing mayaman sa langis at natural gas deposits, gayundin sa mga yamang dagat kagaya ng mga isda.

Noong 2016, nagdesisyon ang Permanent Court of Arbitration na walang legal na batayan ang malawakang pag-angkin ng Tsina — isang desisyong tinatanggihan ng Beijing.

Noong Hunyo, muling pinatibay ng Estados Unidos ang kanilang pagtatalaga sa seguridad ng Pilipinas matapos paratangan ng Maynila ang Tsina ng ‘sinadyang aksyon’ upang pigilan ang resupply ng tropang Pilipino sa pinag-aagawang Second Thomas Shoal.