Bilang ng Walang Trabaho bumaba ng 4.5% nitong Hunyo

Ayon sa datos mula sa Philippine Statistics Authority (PSA), bumaba ang bilang ng mga walang trabaho sa Pilipinas nitong Hunyo 2023 sa 2.33 milyon mula sa 2.99 milyon nitong parehong buwan noong nakaraang taon.

Ipinakita ng preliminaryong resulta ng Labor Force Survey nitong Hunyo na ang unemployment rate ay 4.5%, mas mababa kumpara sa 6% noong nakaraang taon, ngunit mas mataas kumpara sa 4.3% noong Mayo ng kasalukuyang taon. Ito ay dahil sa pagdami ng mga kalahok sa labor force.

Ayon kay National Statistician Dennis Mapa, may 741,000 karagdagang katao ang lumahok sa labor force. Ang Labor Force Participation Rate (LFPR) nitong Hunyo ay tinatayang 66.1%, o humigit-kumulang 51.17 milyong Pilipino na may edad 15 pataas.

Samantalang ang employment rate nitong Hunyo ay tinatayang 95.5%, mas mataas kumpara sa 94% noong nakaraang taon. Ang bilang ng mga may trabaho ay umabot sa 48.84 milyon, mas mataas kumpara sa 46.59 milyon noong 2022.

Ipinahayag din ng NEDA na patuloy ang pagsusumikap ng gobyerno sa labor upskilling para mapabuti ang kakayahan sa pagtatrabaho ng mga Pilipino. Binanggit din ni NEDA Secretary Arsenio Balisacan ang kahalagahan ng pag-modernize ng training at vocational education upang tugunan ang mga bagong pangangailangan na dulot ng mga emerging technologies tulad ng artificial intelligence.

Pinapakita ng pagbaba sa unemployment rate ang patuloy na pag-unlad ng ekonomiya at ang patuloy na pagsisikap ng gobyerno na mapabuti ang kalagayan ng mga manggagawang Pilipino.