“MARAMI PA NAMANG PASKO”: HUWAG MUNA MAMASKO SA MGA NINONG AT NINANG – DUTERTE

Ito ang payo ni Pangulong Rodrigo Duterte sa mga batang Pinoy na nagbabalak na mamasko sa kanilang mga ninong at ninang ngayong pasko sa gitna ng pandemya.

Mas makakabuti umano na ipagpaliban na muna ang paghingi ng aguinaldo ngayong taon dahil marami pa namang pasko na darating.

Ngayong holiday season baka mas tumaas aniya ang tsansa na magkahawaan sa COVID-19.

“There is always a time, now is the time to be… hindi naman sedentary, but iyong kalma muna. Tutal, marami pa namang pasko eh,” saad ng Pangulo sa kanyang public address na inere Disyembre 16.

“Huwag na kayong maghingi-hingi sa mga ninong, ninang kasi kawawa ‘yung mga ano…Tapos maglabas ‘yung ninang mo pati ninong, mamili dyan sa kung saan-saan, idamay mo lang,” dagdag pa niya.