Pag-aresto kay Alice Guo sa Indonesia Kumpirmado ng NBI

MANILA, Pilipinas — Kinumpirma ng National Bureau of Investigation (NBI) ang pag ka-aresto kay Alice Guo, ang na-dismiss na alkalde ng Bamban, Tarlac, sa Indonesia, 11:58 PM ng September 3. Ayon kay NBI Director Jaime Santiago sa isang panayam sa radyo, nasa kustodiya na ngayon ng mga pulis sa Indonesia si Guo.

Ang pag-aresto sa kanya ay kasunod ng pagkakadakip sa kanyang kapatid na si Sheila Guo at kasosyo sa negosyo na si Cassandra Li Ong, na naaresto sa Pilipinas noong nakaraang buwan. Si Alice Guo ay nasa ilalim ng masusing pagsisiyasat dahil sa umano’y pagkakasangkot niya sa mga Philippine Offshore Gaming Operators (POGOs) sa Bamban.

Ang kanyang pagkakaaresto ay naganap matapos siyang umalis ng Pilipinas sakay ng bangka kasama ang kanyang kapatid, na umiiwas sa mga regular na exit points, na naging sanhi ng hirap sa pagsubaybay sa kanyang galaw.

Ayon sa Bureau of Immigration, si Guo ay nasa Jakarta, Indonesia, mula pa noong Agosto 20 at mahigpit na binabantayan ng mga awtoridad doon. Ang pag-aresto kay Guo ay bahagi ng patuloy na pagsusumikap ng mga awtoridad ng Pilipinas na tugunan ang mga ilegal na aktibidad na may kaugnayan sa POGOs at iba pang mga kaugnay na paglabag.