8 taong gulang na batang lalaki, tinaga ng kaniyang amain

Tama ng pananaga sa ulo ang tinamo ng isang batang lalaki matapos tagain ng kaniyang amain habang ito’y natutulog dakong alas-6:30 ng umaga nitong Miyerkules sa Brgy. Matinabus, Sigma, Capiz.

Kinilala ang suspek na si alyas “Jo”, 44-anyos na residente ng nasabing lugar habang 8 taong gulang naman ang batang lalaki.

Batay sa imbestigasyon ng Sigma PNP, nakainum umano ang naturang amain nang makita ang bata na natutulog sa kwarto ng kanilang bahay, at sa di malamang dahilan ay bigla nalang nitong tinaga ang bata.

Tinamaan ito sa ulo na agad ding dinala sa Dao District Hospital para sa kaukulang pagpapagamot.

Napag-alaman na nagtatrabaho ang ina ng bata sa ibang lugar kaya’t wala ito nang mangyari ang insidente.

Samantala, kulong naman ngayon sa Sigma Municipal Police Station ang suspek para sa karampatang disposisyon.