Driver at helper ng wing van, nahold-up ng apat na kalalakihan; Mga suspek, arestado

Tuluyang naaresto ng mga kapulisan ang apat na kalalakihang nanghold-up sa driver at 2 helper ng isang wing van sa Brgy. Rombang, Sibalom,Antique.

Kinilala ang driver ng wing van na si Allan Atadero, 43-anyos at ang mga helper na sina Fernando Alvior, 23-anyos at Jome Alben Ramos, 29 anyos na pawang mga residente ng Iloilo.

Batay sa imbestigasyon ng Sibalom Pnp, mula sa bayan ng Pandan ang mga biktimang sakay ng 10-wheeler wing van at tumigil muna sa nasabing lugar para sana magpahinga.

Ngunit bigla umanong may lumapit na 4 na kalalakihang naka motorsiklo at may suot na helmet at kapote sabay tutok ng baril sa mga biktima at sinabing hold-up.

Nakuha ng mga suspek ang bag na may lamang halos P900,000 at humarurot palayo.

Samantala, inereport ng mga biktima sa otoridad ang nangyari  at agad ring nakilala ang mga suspek.

Sa pamamagitan ng hot pursuit operation ay naaresto ang mga suspek na sina Alvin Mariano, Gabriel Tubianosa, Charlie Mariano at Jafeit Cabrillos na mga residente ng San Remigio, Antique na nakatakdang maharap sa kasong robbery-hold up.