Aklan News
Magbabarkadang sakay ng motorsiklo, bumangga sa kasalubong na L200 Van; sugatan
SUGATAN ang tatlong magbabarkada matapos na bumangga ang sinasakyang motorsiklo sa kasalubong na L200 Van sa bahagi Sitio Sa-ed, Brgy. Alegria, Buruanga, Aklan bandang alas-4:35 ng hapon nitong Sabado, Mayo 24.
Ang hindi na pinangalanang mga magbabarkada ay edad 26, 27, at 16-anyos, parehong mga residente ng Brgy. Mayapay ng nasabing bayan.
Sa imbestigasyon ng Buruanga PNP, mula ang motorsiklo sa Brgy. Tag-Osip at pauwi na sana sa bahagi ng Brgy. Mayapay.
Pagdating sa lugar, umano’y umagaw ng linya ang motorsiklo dahilan upang mabangga ng kasalubong na van.
Dahil sa impact, nagtamo ng minor injuries ang tatlong sakay ng motorsiklo na binigyan naman ng paunang lunas ng MDRRMO-Buruanga.
Napag-alamang ang van na minamaneho ng 43-anyos na taga-Mansilangan, Bacolod City at papunta sana sa bahagi ng Balusbos, Buruanga para magbakasyon.
Samantala, nagka-areglo naman ang parehong mga sangkot pagdating sa Buruanga Municipal Police Station.| ulat ni Arvin Rompe
