Estudyanteng naglalakad pauwi mula paaralan, hinarang umano ng isang armadong lalaki

Hinarang umano ng isang armadong lalaki ang isang grade 4 student na naglalakad pauwi mula sa isang paaralan sa bayan ng Makato.

Kuwento ni Punong Barangay Maria Victoria Tagala sa Radyo Todo, nangyari ang insidente nitong Martes, Setyembre 19 ng hapon sa may boundary ng Brgy. Libang at Cayangwan kung saan wala halos na mga tao at kabahayan.

Napag-alam na naglalakad pauwi ang biktima kasama ang nakatatandang kapatid nitong grade 5 at nakababatang kapatid na grade 1.

Pero kalaunan ay napansin ng nakatatandang kapatid na wala na ang biktima at hindi na nakasunod sa kanila.

Tinawag niya ito at pinaghahanap hanggang sa nakita niyang hawak na ito ng isang lalaking naka bonnet na may dalang mahabang armas. Tinakpan din nito ang bibig ng bata at tinadyakan.

Nagsisigaw umano ang nakatatandang kapatid kaya binitawan ng suspek ang biktima at tumakbo palayo.

Ayon kay kapitan, nanginginig at umiiyak pa ang biktima nang magpunta sila sa Makato Police Station.

Iniimbestigahan pa ng mga kapulisan ang insidente.