Habal-habal driver na tulak ng droga sa Boracay, nabingwit sa buy bust ops

Inaresto ng mga kapulisan ang isang habal-habal driver na tulak ng droga sa isla ng Boracay kaninang madaling araw.

Kinilala ni PLt. Jaime Nerviol Jr., team leader ng Malay PNP ang suspek na si Jam Joseph Castro, 26 anyos.

Nakumpiska mula sa kanya ang P1000 na buy bust money at dalawang sachet ng suspected shabu.

Itinanggi ni Castro na nagbebenta siya ng droga.

Pero ayon kay PLt. Nerviol, nag-aalok ng droga sa kanyang mga pasahero ang suspek.

Matagal na rin umano nilang sinusubaybayan si Castro pero sadyang mailap ito.

Nakapiit na ang suspek at nakatakdang sampahan ng kasong paglabag sa Republic Act 9165 o Comprehensive Dangerous Drugs Act of 2002.