Aklan News
Magtiyuhin, sinaksak ng 3 menor-de-edad sa kalibo; tiyuhin, pat*y habang sugatan naman ang pamangkin
PAT*Y ang isang 25-anyos na lalaki habang patuloy namang ginagamot sa Provincial Hospital ang 15-anyos nitong pamangkin matapos na pagsasaksakin ng mga menor-de-edad nitong madaling-araw ng Biyernes, Mayo 9.
Ang nasawing biktima ay 25-anyos na residente ng Bakhao Sur, Kalibo habang 15-anyos naman ang pamangkin nito na taga Calachuchi Road, Andagao, Kalibo.
Batay sa ulat, papasok sana ang dalawang biktima sa isang food establishment sa bahagi ng Roxas Ave., Poblacion, Kalibo nang harangin ito ng dalawang mga menor-de-edad.
Nagkaroon pa ng pagtatalo sa pagitan ng mga sangkot hanggang sa pinaalis sila ng guard ng naturang establishment.
Bigla namang hinabol ng dalawang mga menor-de-edad kasama ang isa pang binatilyo ang mga biktima at inundayan ng saksak gamit ang 12 inches kutsilyo.
Samantala, dumepensa pa ang mga biktima gamit ang tubo panghampas.
Nagtamo ng mga tama ng saksak ang tiyuhin sa kanyang tiyan at kili-kili na dahilan ng kaniyang pagkamatay habang ang pamangkin nito ay nagtamo naman ng sugat sa kaliwang kamay.
Kasalukuyang nasa kustodiya ng Kalibo Municipal Police Station ang tatlong Children in Conflict with the Law (CICL) na salarin ng insidente.
Napag-alaman na ang nasabing mga CICL ay dati na ring nasangkot sa ilang mga insidente sa bayan ng Kalibo. l Ulat ni Arvin Rompe
